GAALI SAARE

Say-gaali saare

1)

Wonna may gubat inni yanih yani

Yi baguy

Namma lak way  daqamak beyte

Filla warri baxak beyte

Baadeysak baru tengeddee

Agbi wee kucul intilliy

Labha wayte gob ellel liy

Gaali wee baru suddal liy

Namma labkah amo qeedooda li

Kimbiro’ qari celta qadafta le

Gaali qassoowek qeedo liy

Gaali dattoowek baru liy

Barwaliy bari bayse xagar liy.

Soda tokme caxak bathe

Barwa tooqobe leek bathe

Alla yan mari soodayye

Yooy  yaaxige barwa yye

Loowe loowe barwa kok effere

Waase waase saqooba kok effere

Kimbir edde silaalalita burqi liy

Barud caysamaliy xagxaginta le

Naasi nargoh umam makkalliyo

Matto gaalah umam makkalliyo

Manda gala qibiirissa

Booxa gala gariirissah

Walwalah caxa neyyeeqe

Xaakorak bacaril hayne

Garruwtah tanik angut tanik meqee

Angu xaagu malik maaqu lek meqee

2)

Wonna may gubat inni yanih yanii

Sabtic inna le geera uguuxusey

Caxxa ceela caraa waagexisey

Intik teyna qaxah wayte

Anguk teyna canah wayte

Ibak teyna gexoh wayte

Xag baxal gabah abne ayroori le

Of foroddini dilwa le royta

Alma kee xaso diimin kareera

Qambisen lusi mayxaali

Ammanoowe sugum ceelay

Raddu wayta xalaatah anay liy

Dat rob innah ibay way rube le

Carra mallo culak yen gaanibow

Bar hinnay laqo hinnay goboysoney

Can hinnay cado hinnay saaciley

Maaci maacisem ayrol teexege

Ayro kortem iraawol teexege

Gaala meeleelay tuboh assa lee

Cundubul naba nargo le baanay

Abba waa baxi tikya le caawiy

Ayrol asse tiroh bisu liy

Hoxxa way yi girah xaw liy

Gubat inni yanih yanooy

3)

Innih awki baxay baaxo maaxiga

Baaxo maaxigay deegak koo beya

Qayso maaxigay serrebba kaskame

Tooqobek sila kaybulleeliyo

Tiggilek caxa kaybullee liyo

Faxxa baaxo maliy faxxa qayso le

Canti laaleh amok maca tekkelee

Namma seekoytak maca tekkelee

Xoggaliitah amok maca tekkelee

Bunkat elle qatuuti le booxa

Cooyto macxi dab elle le booxa

Gansal elle sillaalo le booxa

Qaddi namma barak maca tekkelee

Urru taynabok ux koomah gacee

Qayso faxxek ererraaqi dangabey

Lee faxxek dora saagan amok radey

Ammanoowe sugum ceelay

Dawwek ooba camar ceelay

Biiliqis le qamay ceelaay

Agbi innah qasa yaalummaami le

Laahi innah qasa maysarriida le

Yemqek agbi xagar baaha a

Yoomek illi xagar baaha

Gaabu sinni daqar ku dayim mali

Ange wayte qamur yi dayim mali

Caytek, gaabu maqanxa baxah acccuwey

Anxageh yi baxah gide maxciney

Cayyeh immay amo berra maxciney

Numtin akkalh udda muden bara

Udda hinna ku wayto muden bara

Garqi digdiga koo mirteh

Nan xaloolile koh mirree

Garqi deega qaboola abneh

Ku filla dubuula abneeh

Baaka carri dumay ceelay

Uddaleyti kasal ceelay

Cax malil caxa ceela addoodi liy

Num malih kedo yakke addooda liy

4)

Yaarre carra qanayti qalaamale

Orba carra kuxubba mamaatale

Qakkar orba le kuxbi dagiire le

Dange yaggile ginni baxih baxa

Gaala baaduwa sunduc maqanxay

Qalla luk daqar ooba marih gexoy

Maaca qellami xawle kareeray

Hatkisen baxi weelalliy

Kayra digbe qibin ceelay

Warqiley maaral xaaqaana le

Saqabay saqal elle mudaana le

Maaca xalte gariy gammalolta le

Karmak kayra masangel iraawole

Kuyya wandabitey kayra seedarey

Seedar af le baxal fayya rammiyey

Geeri gaydabi kok baxa yooqore

Of foroddini kok gaala yooqore

Gaali foorek adoylin baxa ugusey

Gaalay dille xala innih ma balliyo

Gaali dille xalam kayro neexege

Dille laahi saluh xalte

Dorri addal caxa lih tome

Dirdiril baxa lih tewqe

Dirdiril gari celta baxa ugusey

5)

Waynu wayna lacaay waali gexxa le

Baadayay marin baaxo taloole le

Giqliliy baxa deebol qarissa le

Is xagay qamur ayroddi faxxa le

Qikkirriy barudut taggarre le

Caawin angu maley gaala raddale

Mislinnah gune liy

Qeeli innah racu liy

Maaci lawla goroyyak tookome

Biqdi mabraka ciggilte

Biqdi innah  tiya boddasse

Can xabuxxi caxah bahta meqre le

Xiine num mukunak xinta meqre le

Toome karma caxal darru

Temqe karma calaldeddah

Bunkatak bila l’aamo waxeexisey

Tahla le urru nek iyyeenih

Cayye gaala kok iyyeenih

Ninni nabsi calaalisneh

Gaali nabsi duqum hayne

Gaane dorri ni gaalih saamile

Net meqe awka ni labhah saami le

Abba sarri baxah lafta

Baaxo sarri nakuh tayse

Qeebi moydor afak yayse

Yab makaaban afat yayse

Yi baguy anu koh lafta mayaa

6)

Wonna may gubat inni yanih yanii

Gubat inni yanih yanii yi baguy

Ulqi afih daley inti bagih waraa

Yi baguy

Xer gitat radek okli ror mali

Waanisak gexek agbi walal mali

Illaltal xalek illi anay mali

Maaca xalte guruddoh anay mali

Ulla kak danan ullah suruy mali

Cayraril madi xawle guyacta le

Awdi afal godi hayta corroodike

Maaca xalte gariiy gammalolta le

Gaali namma numuk kal waan mali

Yeedeqek bagi cubbi le num faxa

Yukkuwek duwi ceetal le num faxa

Saxxanaay ina faylissat mali

Barra kicna maruw deegat mali

Koona karma sugek yaaba num faxa

Namma daaba korek yarde num faxa

Bar gexek saro dangaba num faxa

Gaali gabla culek yaaba num faxa

Koo le num maro dimmiicam meqe

Caxal inti qasuk inti qasam meqe

Caxak orbe cinam meqe

Ux kedoy  qabal edde dagot mali

Ardat edde lagaqya bayot mali

Maxcot edde ximooma bayot mali

Gaali can takarat cabu waa mari

Baklih ummuunok kudu waa mari

Gala qayso le baaxo macah beyaa

7)

Wonna may gubat inni yanih yani

Yi baguy

Yi bagu baxay anninnaa

Carra qibni mataaka mataaxiga

Saaku qeebi mataaka mataaxiga

Qeebi kee qibinak addal nanii

Garruwut baxa saarissee

Gulluqut bagu doogissee

Tirtirat qibina agxissee

Tilkiqit qamur allissee

Gaali addal lafa le ala tanim meqe

Urrut urru xaga awki yanim meqe

Buxak elle ooban kaloo

Kalok elle ooban buxa

Yalli way giti wadbah koo gine

Yi bagu baxay anninnaa

Agbi lak nabo xaylo ma yaynaba

Laahi san nabo xaylo ma yaynaba

An ku fayla dabaanak raaqise

Illi num qululuh xin wee

Laahi num gura qoodaare

Yoo kee koo walalak xinne

Woo barak bari yaysem makkalaa

Bari yaysem makkalaa, yi baguy

Maaray inna gubak xeeray

Sublah innah iraawo qiday

Yanguli aytile kaxbaaqay

Orros inna le ceemallo

Qibnah axca le dukkuuba

Reytah angule waaloyta

Sulbilow gileh inna sulbilow

Bafta low saroh inna bafta low

8)

Gurra wayti nek able litommayaa

Massaamma kok able lino mayaa

Yi baguy atu dan waytaamakaa

Yeedeqe agbi nek dan waam meqe

Bandukut bula naabaanam meqe

Yi baguy

Yi bagu baxay anninnaa

Abba kah cabe wee num kadaadara

Ilmoytal naba daalah abam mali

Yi Baguy yi bagu baxay

Sarte marto fidot tembexe

Urte wallu gexot tembexe

Arduk asek koo geeliyo

Arde wee mari koo meeleelita

Heerik elle radan moolaalile

Le numuk bagu xagta tumamme le

Xeerih elle radan qasa kaare le

Cal way elle caban qeskaale le

Af qasin sara lem koo gee mara

Marto kak gale lem koo gee mara

Koo geek meqem innih geeliyoo

9)

Abba ruube waqah ma gexinnito

Urri baahe katah magexinnito

Akke wayni taway yekke

Able waynu taway nuble

Karma hanniya koh takkeemil

Dadaq orroya koh yakkeemil

Karma ceela sugum geytaamal

Yoo hinnay gari kot yaabak yen

Gari kot yaabak yenee yi baguy

10)

Gala namma tiyal nanu naaxige

Nargo xalta qarum bagu

Gala beyta qarum laki

Gaali kak rade galcooda

Urru taynabe lak naba

Yi baguy yi baguy

Yi bagu baxay, anninnaa

Gexxem able kalah ku iba eexege

Xaltem able kalah ku baxa eexege

Yi baguy, yi baguy

Yi bagu baxay anninnaa

Yi bagu baxa numma bagu baxay, yi baguy

Qayso gibdoh amoh dululu

Lee badaydah afih buyyi

Matto waacito teyyeqe

Saqab gingino teyyeeqe

Buuri keena malik buuril xaley

Yi baguy , yi bagu baxay

Yi baguy

Ulqi afih dale inti bagih wara

11)

Riida ceela laqad bolkoquh xala

Samla ceela qali arbaahimih xala

Dimhahim baxa dooroh afal xala

Macammad saridik xer gariiqo

Sek saloomanak qasa burqili

Idris baxak qado kolfa

Muuse baxak qasa meqre

Lee qalii baxih aydooda tookome

Qayso lekke qasam qado tookomeh

Leeh afih caxa qammaadi tookome

Qasa gonna wadar num ma yaagura

Folod kontomu kak yakke

Saqab lactama kak yakkee

Cisra kak daka tayyaaqeeh

Gaali gaalah abuusanna moggola

Bed maliy gulubuk maggo qasbo le

Anxaqa naqabuh bedu kak cine

Magdafa naqabuh guuro kak cine

Qasboh addo*bilen gob akiyya le

Gibdo namma qaxal koo alqayto le

Alaa kee gudurul koo cusento le

Gadil kee sarigil koo celemto le

Dakka ceela mayabbi buxal xala

Gambi burqili dooran buxal xala

Gaagi namma qaxal koo qarabti le

Araf namma qaxal nanu koo lino

Yi bagu baxay anninnaay

Yi baguy

Yi bagu baxay anninnaa

Geeri fokko banayti baxah xala

Ginda ceela *sumaaqiltoh xala

Kuxubtay faro geeso buxal xala

Filli koyta caxanti* badu

Karsi godma qas alqayto

Nammaytih faro kaara badu

Karsi nammay ereeka badu

Gaagi namma qaxal koo qarabti le

Bad wagittaa qalel koo qarabti le

12)

Manke orobta kok iyyeenik

Adda xeeri dora orbah an ixxicey

Mankel asse kok iyyeenik

Suula mango daqaaral ase ixxicey

Qadab orbe kala urruliy

Caxak orbe cina abba liy

Yi bagu baxay anninna

Gude qunxa falum liy

Amo xeeri daqar liy

Qibni muuguta yellek kollay

Qibni godmali fan foray ixxica

Soola kee saqab edde tanim meqee

Qibni bar guyyac edde yanim meqe

Xayyi bara xayyi bar

Xayyi bar camad edde yanim meqe

13)

Kabba yab talamak kaydoodele*kayguudele

Kurri qaslayitik koo eleelele

Yi baguy

Yi bagu baxay anninnaa

Yaabah inki bidaaru ma taamina

Qaysoh inki dolaytu mataamina

Laqad baxa garri damal liy

Camad baxa badda afal liy

Iyyac babxa maytim qaxal liy

Acaw baxa daabi qaxalliy

Macammad baxa durti, aamolliy

Macammad baxa maagayralliy

Qas maariita gurak xaxxaqal liy

Qali baxa diidah afal liy

Macammad baxa makki bagul liy

Leqen baxa guucum qaxal liy

Qabay baxa foxxoh afal liy

Faras baxa baxqi buxal liy

Qarbis baxa millel liy

Taane baxa geegal liy

Aydaacis baxa weeqaytul liy

Canfaxe baxa furdah afal liy

Canfaxe baxi weeqaytu kol tabe

Caggi yayyo magentaamo kol tabe

Banayti baxii gaaweela kol tabe

Caggi keero qasaa baxa kol tabe

Arre waa qari teeri qaxa

Mankalaalaba suucum amo

Haada xayla cinen moolal

Fantabul giba koo tuble

Kalol amcari koo yuble

Gaalla radda xisen gawra

Sifta radda waqin dora

Carri bar dite lil koo nootoke

Qilsi xayla li warsayyi kok cule

Taane filli waqin dora kok rade

Sifta ken xagele iyyeeni

Garqi koo qidele iyyeenih

Kot heen gile gaalat hee lino

Net heen gira labhat hee lino

Aysa teemene labhat neemene

14)

Lee xagam qadi leh maaxaggiyo

Qayso calkora leh maaxagiyyo

Qangalaaloy ibah gexxa k’arkise

Dakni caara le gubbuysi

Xarrabay guma taaqube

Qangalaaloy ibah gexxa

Maaca xiina macammadih addo

Madqa dirri macammad tookome

Camad absumi koh yaabe

Madqa girrifo waysiisseh

Meeri qad mara waysiisse

Mukno qaxxis Ababal cine abba lito

Ayra gaali gasol kabba yiggife

Yabbah abba morootom inki gilet qide

Saalic inki  gilet soddom qide

Dammahoyta meqem rasi yaaxige

Seeka gala meqem nanu naaxige

Camad Idriss