Saxxaq Qafar qaadah abta gadittek gadak teenay, elle kaa abaanam Dacarsitto marih adda. Labhaa kee Say mara (baxuw) fooca kee foocah ittat gacca iyyeenih gaba edde aagaruk ibak edde argaduk aban. Saxxaq xeflih abaanam wakti meqeeh, canak cayyaanah, rob radaah, hinnay, kaadu, digiiba akkiiy, Lab urruh salot aban waqdi akkiiy, qiddi wakti abe yakken. Saxxaq booxal elle aban innah tugactekii, Lab maraa kee Say marak mariiy, wak yaabah, mariiy, marah idu abak yaaban. Tonnaah mariiy, mara keenik ankacsa. Saxxaqal Lab maraa kee Say mara sitta xaafanah hinnay, kaadu sitta ilqaanah, sitta faylisaanah, iisa marak marak teeni luk orba. Tonnaah kaadu saxxaqal say mara baxuwwa tekkek kallacaanah saxxaqat edde tet oggolissa haam tet kallacak suga. Saxxaqal isi kaa oggoltam takkeeh hinnay, kaadu kaa cintam takkeh. Usuk is teetil faylisaah is isi abiino kaal faylissaah, tonnal mariiy, maral hiddootak ittal aban. Isi edde kaa cinteemit sunni maray, fanat keenik yaabu waa yaniih usuk teetih le kacnu teeti warisak ken fanat yaaba sunni mari.Too maroh addat saxxaq aba marih addat awkak abi- baxay, teetil rihmam faxa woo maroh addat yaniimih, woo num saxxaqal tet kallacaamah, tu abu maduuda. Toh kah kinnim Qafar addal digiril ittat aban xaafu kee wonnah taniimil sitta katee waanam kee sitta anqibe waanam qaadah addat axawah tan madqay, saakuuk sitta lih haysiteenit axawah tan.
Macammad Adaabo:
Nooriy aham macaalatay, manni xinto
Atu yoh nagay, tani kunni yoolafak
Malak baxay, atu intam kok abbeloonu
Noorisa:
Kaala yoh ankacis mariiy, kaala le immay
Qangara tittak abbe waanam kalaata
Yaaba num iyyam abbe waanam caraamu
Dumah abte labha taysiise yab qaxah
Yaaxige laahi yayse guddaaqal itta
Ku dabaanih awki kot yaysew, asmatah
Duma tuble boora koh taysew, arcibah
Cayli celeema koqsol angaraw, abta
Malboh idoola garbol angaaraw, abta
Qeebi lubooka garbol angaaraw, abta
Seeka salat darayyal angaaraw, abta
Qunxa mariino booxal angaaraw, abta
Daban mari elle yangoorem dabaana
Tu yaaxigiy, tu igimak walal mabica
Namma tu yaaxigik walal missa yakke
Namma tuh iggimak walal finqa yakke
Dabam mari sitta yassa kaxxam le
Caxa gubi keena leeh yab ilmoyta le
Macammad Adaabo:
Raadiyoy ankacis huteelil digirta
Duma able ween maqaaneh masangeelana
Uble maqaane gonnusam say mara kee
Numuh mahoolaana cal kak aaxige waan
Aaxige waan numuh mahoolan maweeqan
Walal abte labha taysiise moydorey
Dumah able wee gitat yuble num gexa
Malak baxay malaatal geyaanam tayse
Malak baxay walal yuble num ma xiina
Dubuk yuble laa gexenti maraabita
Malak baxay, walal yuble num maxiina
Buuba can elle tuble guubuh tamaate
Tanim igma barra kah takkem ah macay?
Caya luk tenek macaay, moydorey duumah?
Raatisa moydorey, daban num daban num
Raatisa moydorey, xabaadoyti faage
Kuwadayti kok yam obbiy bilen giley <sunni num fanak iyya qangara>
Noorisa:
Yoo ankacisay gexay, Cusen kuulusa adoy
Numma Qalii hidaw, diraabat mayabta
Numma Qalii hidaw, taniimit walalta
Kee anu kolle giddiyam, mayyu barray
Kibu maaxigay, yab iyyam kok axcu waa
Yaaba numul, caban yab inkih mayaaban
Wagta numul, caban lac inkih mawagtan
Ruuba numul, caban lac inkih maruuban
Dacre num buxa, elle tanikke yaaxigeh
Elle bayekke yaaxigeh, asse num lac
Edde cabekke yaaxigeh, yaabe num yab
Yaakume num kala, nagay hinna daffeek
Xaagu kak abba haan, fidol hayya haana
Daro kah riyan, gaqammoyta kalbiyek
Gexso yucsubek, meqe wakli kaat aban
Kunnabisenno, kunnabah qibna tekkek
Arcibisenno, arcibah qiban tekkek
Boynah arac, mageytima lee temeggek
Yaabah arac, mageytima yab yemeggeek
Yi migaq maloy, yok abba migaq mali
Macammad Adaabo:
Magalik gubat hayis, sanbeya walal
Camad baxay, mala itta geyaanam tayse
Camad baxay, numul yismiteenim haana
Afqado biyak ,num biyaaka Noorisay
Macammad Adaabo kol caba Noorisay
Data af kee data amoliy, qasa Noorisay
Makaabanti Noorisay, walal ankacis
Alka laf maliy, makaabanti Noorisay
Dago cooma caggo, taysamme Noorisay
Uma yabli fiqma, yaysamme Noorisay
Uma misli madqa, kol korsa Noorisay
Migaq kee maqaaneh, sanbeya kol caba
Noorisa:
Tara yol tabissek eglayto kinniyoh
Mala yol tabissek, ahliita kinniyoh
Yaabele sanbeyay mariiy, isi cubbit
Warsele sanbeyay mariiy, isi geytot
Foddaw anu inni cassabat, yaabiteyyo
Foddaw atu isi cassabat, yaabitetto
Awki yab elle yaaxigem, manni gurra
Afiito edde heen rakub, gexo qaxmaqe
Tamakkeh yemeetek, yab gexo qaxmaqe
Eexek elle aaxigennah, yoh inte
Sanbeya teegeememih, addat tanih tan
Missila tekke aaxaguk, kol yaceeni
Yab gita bah, numuw digirtam tu hinnak
Macammad Adaabo:
Raadiyoy, ankacis huteelil digirta
Say marih miraacey, nanu innam ankacis
Say marih milikkatey, innam ankacisi
Cassabah aaxige itta, yabtek wadiirih
Ah kok umah kok iyya num toobokoyta
Qisi koo kalah yanih, kat Camad baxay
Noorisak esseram liyok soola Labhay
Duma yabne yab linoh, qunxa Noorisay
Yaaben yab arac faxa, Camad Noorisay
Xalen baxi can faxa, Camad Noorisay
Edde tanim kol essera yabte yab kee
Noorisa:
Sanbeyay inki waqdi yoo kakka haysa
Ankacisay gexay, Qalii sanbeyay yoo
Nan maca geyne Sanbeyay yabne carra
Meqeh exce yaabay, ingedde maay liyo
Ah maaca naharaay, atu edde tublem
Koomah amoy, atu elle yoo tublem anni
Sin rasi yaaxigem tenek, yok mareebin
Rasi texcel elle koo duuda yab yanoy
Anu qunxiyoh, yok abba migaqa nabah
Anu qunxiyoh, yi meelah nabah
Yimigaq cabaay, yok abba migaq nabah
Lafta Macammadow, anu abba migaaqah
Lakmise waa duqur yan, abba migaaqah
Lakmisa num yan, abba migaaqah
Awkaw aham macaay, yi fan kah wagittam
Macammad Adaabo:
Tayse Camad baxay, yi kaala ankacissam
Gira kol qidaa, Camad Noorisay ni yab
Camad Noorisay, ni cassab amot hayis
Amo kok kah ayro kah cintam ah macay
Yaaben ahdi koh suga, yaabe num sugek
Camad baxay, Yallih amrik num macatan
Atu sanbeyak, macattimta too giidey
Yallah uqunxuyay, afiqmah wacarriy
Abitte baqli koh yayse, kalbi fayxih
Camad baxay, kok iyyaanam abbe wayta
Caalat akah tagiyyirem maaxiga immay
Noorisa:
Kaala yoh ankacis mariiy, kaala le immay
Numma Macammadow, diraabat mayabta
Numma Macammadow, taniimit walalta
Abbah agaaguluk, caxak yab kol orba
Meelah agaaguluk, canel daabitaana
Barra qasaalah aylahuk, kallacaana
Gaala le loynah aylahuk, kuulusaana
Kalbi biyakta sanbeyay, yucsubeenim
Sunku biyakta sanbeyay, yukkuqeenim
Sanbeyay, aysa yoomena exceh manayyo
Yab cabu sinni, num kasam tayse yaabe
Amo yok kalaanamah, sanbeya axcu waa
Seeta nakkalih im biyaakitak xinta
Yoo kaala sanbeyay, adaffeynah addak
Macammad Adaabo:
Ayti malik kalih numuk, tibba gacta
Koo amine wayti hinna, kol kah neemeetem
Labha litoomih asmatah, kol nemeete
Camiten num iggimak, yawqe Noorisay
Takkem aham macaay, aliliq nel edde
Edde taniimih asmatah, kol neemite
Baxah ayti le abba way, mattu, Noorisay
Macammadow gibdi, qangarak dagurey
Macammadow, Noorisa abte yab kasele
Sanbeya kok daban maraay, ken dagurtek
Nooriy awayyih, agbi yab ruuba mango
Axce lito amah yok, iyyeenih immay
Marcaba Noorisay, atu intek wadiirih
Camad baxay, yab beyaay, mafinqiseney
Kedoh abbah hinna, ku abbah migaaqak kal
Walal kee maqaaneh, sanbeya kol caba
Mattu dahab xale baxay, milki dagna
Bagu yeemenen wadaytul fakaana
Noori lagok le bas, data af ke data amo
Qasa Noorisay, data af kee data amo liy
Camad baxay, ku kaala ankacisnu wayna
Noorisa:
Yaaba numih, yab aabbe waanam kalaata
Qangara sittak, aabbe waanam caraamu
Takkem aham macaay, akaalaf yol edde
Labha bakaarisah, cagay kuula Gaali
Labha gileh tace, daban faxxa barra
Amo yok kalaanamah, excem axcuwa
Sanbeyay aysa, yoomenay soola Labhay
Toobokoy, aysa yoomena exceh manayyo
Faxem edde takke way, sanbeya axcuwa
Aysa Macammadow, ku fiqmak maraaqa
Sanbeya yol caba, walal kee maqaaneh
Migaq kee maqaaneh, sanbeya bursutah
Sunni numih yaaba:
Say marih milikkatey, innam ankacis
Ni kaala ankacisam, tayse Camad baxay
Kaa dagurey, Camad baxay, namma kalbik
Iisa neh itte qangaral, digga neh xic
Raaqa yoh inxicey, Qalii sanbeyak maa
Say mari yabti digga lem tayse Nooriy
Mawacarriyin, xaleenak kalih marak
Kok raba num waday, cab islamto tekkek
Noorisa dagro faxxa lakqo gile kee
Kalbi manamma kalbisin, namma fiqmak
Tu maxiqta Noorisay, inki xaagu abaanam
Yaaben yab arac faxa Camad Noorisay
Yab magalik gubat hayis Labha yabte
Qangara siitak abbe waana kalaata
Camad baxay, qisi faatica elle hayse
Noorisa:
Sanbeya dagra yolle, Yallih salat kee
Sanbeya yabta yab, qalulih maruuba
Yab magalih gacissa hee, sanbeya abte
Yab kase waa numow, walaacawlu yaabe
Yoo beya sanbeyay, adaffeynah addak
Mahammad Qali Mahammed
