QAFAR HAYOYONNA

NUMMA KACANU ( True Love)

Nummak kacni qellu maliy, kacni malak yaabukeeh, kacni namma gexoh yani.  Inti kacanuu kee afqadoo baguuk aban kacanuh yan.Inti kacani angaarawak maraaqay,afqado kacni num damaamalah hinnay, saroh innah num yaxmuume. Kacni elle amixxige waa rasu maliiy, kacni yibbixe numuk, luk suge kas kaak fuuqah, isi kasah kaa haa. Kacni Lab num kee Say numul inkim baaha.  Qunxa num kee kaxxa numul inkim baaha.  Bisu maliiy, weelo maliiy, karmal sinam mabaxsa.  Kaa abinnaan mara inki biyaakah biyaaka. Away ahaak gubal Nummak Kacanu abte Saqid kee Saqiida kacanuk tu elle tan inna ahaak gubal siinih xayyoysenno.

Saqid ina kee abba luk mananaay, qayxixxuh yenbeh yen.Taban kee koona <15> karma gufe saaku elle yooboke baaxo cabeeh taama gonanah barrik magaala fanah elle yemeete ikkel wadar gaddalih yan numih wadarat liggida duwah gace iyyen. Laqo isi wadarat asaah bar isi gicma luk wadar exxal xiinak yene iyyen. Saaku xiinik ugta waqdi kay,gicmaa kee kaa wadar daacoo kee caarak bayteh maacisak tene iyyen.

Nammay,haytoh saroy,woo saro kaqlisa wak edde raaqa luk mananaay,sari kaqayloh gaba geyak mananaay, woo saqih daaco kee caara luk wadarat dacayrih gexak yene iyyen.

Saqiida ina kee abba dubuk le baxay hanaawiseenik tene iyyen.Saqiida xintimah kaqaadak tayse kaqaada luk tene iyyen. Sarak sarootuy, wak gacak tene iyyen. Saqiida, Saqid saaku saaku qeerakkaloh buxah yamaate waqdi sari kaak wadar daacoo kee carat bayeh maacisam abaluk tene iyyen.

Ayrok ayrok teena Saqiida  <<  Saqidow gersi sarat gacee kee kaqlise matakka>> kaak texce iyyen. Saqid << geeri sara haamak mayyuuy, kaqayloh gaba kah mageyak macaabo>>  teetik iyyen. Too waqdi Saqiida kaxxam kaah biyaakitteh,  isih edde tan manot kaa haytu waytaamih, gaxana kaah culte.Too waqdi Saqiida inaa kee abbal mala bahteeh << Yinaa kee yabbak yoo kicintoonu>>  itte. << Koo kicinnoh wallah ni baxay,>>  teetik iyyen. Saqiida << yoo tikcineenim numma tekkek Saqid edde kaadu ikcina >>  itte.  << Anu sin baxaay, saqid yi toobokoyta usuk elle xiine waa kaqaadal maxiina usuk akme waa maaqo makma usuk sarte waa sara masarta >> itte.

Woh xaleena teetik oggolteeh, Saqiidah abba haanam Saqidih abak yeneeni iyyen.  Sartan tekkek maaqo tekkek. Ayrok ayrok teena Saqiida wadarat kaalih elle gexxe ikkeli kaah aban maqaane  kaah kah abaanam is isi xaleena luk abte yab kinnim kaah elle warissekkeli, Saqid amah atu yabte yab yot ceelak sugte Saqiiday, immay,ah yoh abteemih kaxxam kulsa koh gacsa teetik  iyyen Saqid.Tohuk wadiri Saqiida Saqid abba haa taamal kaa catak tene iyyen.

Ayrok ayrok teena wadarat elle gexen rikeli Saqiida digibih kaak kalih num oggole waytaah, usuk kaadu digibih teetik kalih barra oggole waamah, xagana garmoyta gubal siitah culeeni iyyen. Sittalih anuk yeneenik, Saqiida digib gufak maacisse iyyen. Oson elle yanin baaxolu barte mari kaxxam daguk yene iyyen. Inki daylaabe anuk yene iyyen. Woo numu Saqiida rihimih faxak yene iyyen. Isi kaa cinak tene iyyen. A daylaabe isi elle kaa cintam Saqid kinnim aaxaguk yene iyyen.

Aha iyyan saaku adaylaabe malseh mala baaheh, too mala Saqid edde yan mara dayli bar+ittoh afah ruubah tet too wak rihmisaamak tene.Too daylaabe iyyem leh iyyen << Labhay,inki num rabaah usuk abak sugem aba mari raaqam faxxita toh takkuh dayli barittoh mara afah rubnam faxximta > > yexce iyyen.  Too dayli baritoh ruuben marata Saqid edde gaxe iyyen.

Tokkeek Saqid kee Saqiida ittak baxsimak maacisseeh numuy, intik ximo keenik riffa heeh << Kacni hawwem mali iyya gad koh abeh rubeliyo yoo elle kassitta gida kee salaamattah ayyufta koh ruubeyyo >> teetiki iyyeh cabe gexe saaku. << Hayya hay,meqeh >> itteeh mariiy, marak salaamattah gaba xagga heeh, Saqid akak foore iyyen. Saqid elle gexe baaxok salaamattah ayyufta kee isi taswiir teetih ruubak yene iyyen. Saqiida elle tan baaxolu farmoh sanduk woo daylaabe luk yene iyyen. Woo daylaabe woo farmo waraakitiy, Saqid Saqiidah ruube yable waqdi farmo waraakit qanxisaah kay taswiiri luk say marih taswiir hayya heeh teetih baahak yene iyyen.

Too waqdi Saqiidat kaxxa aysini heeh too aysinuk gexxaamah duma cinak sugte daylaabe oggolak maacisse iyyen. Daylaabee kee Saqiida digib yakke carra Saqid kah gexeh suge barittok gaba kaleh woo oson elle digban magaalah fanah yemeete iyyen. Saqiidaa kee daylaabe makeenat ittalih tan wak Saqid giti qaxal keenih soolak suge iyyen.Tokkel mariiy, mara keenik yeexegeh, makeenat korissa kaa hayteh duma elle xiibiten caxah guba kaa beyte iyyen. Wokke kaa bathe waka  << a caxa taaxigee >> kaak itte. << Aaxigeh>> teetik iyyeeh, makeenak woo caxah gubal kaa oobisseh cabteeh, akak gexxe iyyen.

Saqid kaxxam wariggiteh woo caxah gubay, woo saaku elle xiibitey, makeenak elle kaa oobiseh cabtee kee digib elle yakke araca ibah gexe iyyen. Digib elle yakke araca yemeete waqdi  Gad abak kaah sugeeni iyyen. Tokkeli Saqidi  << Gad abam faxaah amri siinik faxa >> keenik iyye. Naharak kaah cineenih sarra Gad abam kaah oggoleenih, duma gexe saaku abeyyo  iyye Gad teetih abe iyyen. Too Gad toobbe waqdi qibna Saqiida kinnuk qarik amok raddeeh, edde rabte iyyen. Tonnala Saqid kee Saqiida kacni rabal ittak baxsime iyyen.