Alcamd’axceeh, Yalla faatita afurs’adda
Adam-awka ruccuseeh, faylisam acmada
Ayrol kulli racmat kaal oobay alf’adda
Ayyuntaw, engelaay, iyyeh Yalla uqbuda
Aame waytoonu itta maabina’yye adà
Acmad kateeh inkim iyye awwali’m marah alfaydà
Away tanim maaqu, edde nannom adà
Afak karaaraqaah, urtah yok afqadoh’adda
Adaadaruuy, adiyyatak yan aydàada
Awqe kak waytam afriik xukkoh’awaadà
Awxaqal ken ayyaaqu inki abam awàada
Awweqtuuy ruuba conxo le awaytih’adda
An waq axcem xinte y’aadol awaydàda
An’awdacah, aabbe yok waan way Yallih’awdà
Ahliita’tteeh, akah warisse num adda
Amaan koo waysiisa, koh ma yabla adda
Axcinnah balelsitak koo gana’dda
Ana’away uble’kkek aysa kok m'aada
Assakootinnah inah-baxa abam adà
Aymisam faxa’anu away woo afgalàdda
Afah awqe waa qeebi kee buxah’adda
Aalle waa num ma yana’yyan ullulluh’àrda
Axcinnah iroh-awqiyyi ingibidda
Affare sinnoonum obtim irook-adda
Afriika affare sinnim diglo kull’adda
Abtu gabbate sinnim xisne teetil le gibdà
Addaruk teneeh, mabta agdabaay gàdda
Aalle kal reyta abtu taaxige gàda
Agboyta tene’yyen, deqsitak teneeh Umbudà
Abak catteeh, aaxaguk tene’yyen kaxxa gad’aay
Akkinnaan waq aysuk ten is rasuk gàdah
Anay-maqaaneh wagitak yenen tet’afih adda
Ahaa’yyan saaku temqo tekke’yyen acaadah
Araaharak booxal obte gadah
Awki yemeete yaaxigeh, teetik adda
A’carrat kok aadele’yye dokla kok Umbudày
Abtu ma taaxiga a’bar luk ten hida
Aaxige waa marah fakeyyo kok adda
Assamaq le num celta is gad abta’dda
Assam abuuruuy, baaca tet’dabqih adda
Angu sinniih ikoytak asissam inki’idà
Abooli sinni orobta coc ya urkùdda
Alkumut tet le gasi kah gexam àfak adda
Abte awyat tan Umbuddi tet yiyfiddicen adda
Amoyani abak ma raaqinna is gad’aay
An fakuwaa taway ana’a yaabak adda
Assamat yan mara kak ittam afriika argida
Afriika edde taniih gurrawwayah abtam gàda.
Cuseen Qabbaas
