DOOLAB KEE CANDE-BAXA

Cande-Baxa : Yi qafrih numow yi saboh garay

Doolab: Ah yok ma kedo baxay kaa ma’axigak

Cande-Baxa: Anu kok kedo baxaay, cande baxa

Doolab: kedoh oobokem a bar yok teexege

Cande-Baxa: A bar maaxigay saboh koo liyo

                      Ku magan litok, saboh yoo kakkisey !

Doolab: ku magan ya num saboh loowam maca ?

Cande-Baxa:   Bagi toome kaala yok yekkeh yanih

                        Bagi yoomeh, ulla meclecla (?) may

                        Bagi barbarey gab’abtam leh ma tan

Doolab: Caalibisse bagu’nna, ali danni ?

              Atu kaat culusseemih, kok yoome kaak

Cande-Baxa:   Bari qad barah gacek, xin maaxigaay

                        Anfe waa mariidig emmegeh yaniih

                        Bagi murri can deleelah yeffereeh

Doolab: Cabelek ida canat culbat hayis

              Bagu rub numow, isit toomeh tanik

Cande-Baxa:   Abeweeh, gabbate weem yok takkale ?

                        Ma fan kaa gabbateh, ma fan effere ?

                        Qeexo’oqobeeh, cabe wee fuure liyo

Doolab: Hay anu caxa-dageyna yok takkale

              Sugay, bagu daylisa kok iyyeeni ?

Cande-Baxa: Ado kak xisen baxuwwa ekkeh an 

                      Wadaral caben baxuwwa ekkeh an

       

Doolab: Anu k’aabu hinniyok, k’aabuh waris

Cande-Baxa:  Bololuh qellami gubna ekkeh an

                       Cisaabah teedeqe gubna ekkeh an

                       Agalat teedeqe gubna ekkeh an

                       Cami yoo kasaltoh innah tinkise

 Doolab: At’abtem taaxige, cisab yakke kooy

               Rasi koo at’abte qaybil camta kaay

               Anu koo ma’ssaqaddiyo teedeqek

               Anu ma cigsa hay, gubnah tenek.

Cande-Baxa: Amo qas qalek wadir ma’skattiyyo

                      Amo gaali geera yok tekkeh tani

Doolab: Anu ma koxxa rukam yok takkale ?       

              Ku kataysa way gabat dikki mali

     

Cande-Baxa: Ragabad wadir buxah m’orbiniyo

        

Doolab: Rasut edde-raddo geyteh xiine kooy

              Sunet edde-raddo geyteh xiine koo

Cande-Baxa: Walal labha kaleh agabut liyo

   

Doolab: Agabut tenek, gocittam ma’kkala

Cande-Baxa: Gile kiili godma yok tekkeh tani

                      Yi gil’af maliiy, tu qanxxissah ma tan

Doolab: Anu ma kuurih anim yok takkale ?

              Ku kataysa way gabat madrab mali 

Cande-Baxa: Amo derreh qaxe week ma’ysassiyo

Doolab: Qaxah edde taysu waytam yuble koo

Cande-Baxa: Furanay gaysa wagitta akkeh an

                      Gira biqda quuka gaysa’abeh an

Doolab: Sinam ibbixeh, ogot koh waynam ( ?)

              Ugucut sinam liyom yok takkale ?

Cande-Baxa: kataysak bee faras ximo yol gacissa

Doolab: A kak boolate kook le numuh gacis

Cande-Baxa: Yabbah migaq alah innah seemo le

                      Yabbah migaq danan innah seemo le

                      Yabbah migaq idah innah seemo le

Doolab: Anu hay gaysa liyo yok takkale ?

              Ku kataysa way gabat gaysa mali

Cande-Baxa:   Anu yekkelen baxay boolateh an

                        Duma  yekkelen baxay boolateh an

                        Anu way yoo cabe waak yen num cabeh

                        Kulcuh cande migaq, yi daban bayeeh

                        Migaq yabbak bayeh, yaabuk bayeeh

                        Anu inn’abbah migaq xaluqut qideh

Doolab:  kalo-xinto elle taysem ma’kkalay

               Migaq aysuk elle yaysem ma’kkalay

               Bahimiiy, bayem sinaamah maaqita

               Xaluqut qideh, migaq nel gunnussa

               Isi boola neh ma gabbaaqin numow !